ବିଜେଡି ଟିକଟ୍ ବଣ୍ଟନର ମୂଳ ଆଧାର କଣ? କାହାକୁ ଭିତ୍ତି କରି ପ୍ରାର୍ଥୀ ଚୟନ କରୁଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ?

ବିଜେଡି ଟିକଟ୍ ବଣ୍ଟନର ମୂଳ ଆଧାର କଣ? କାହାକୁ ଭିତ୍ତି କରି ପ୍ରାର୍ଥୀ ଚୟନ କରୁଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ? ଏ ନେଇ ନାନା ପ୍ରଶ୍ନ ଓ ପ୍ରହେଳିକା ଭିତରେ ଗୁମର ଖୋଲିଛନ୍ତି ଛେଣ୍ଡିପଦା ବିଧାୟକ ସୁଶାନ୍ତ କୁମାର ବେହେରା। କିଏ ଟିକେଟ୍ ପାଇବେ, କାହା ଟିକେଟ୍ କଟିବ? କେଉଁ ଅଞ୍ଚଳର ଦାୟିତ୍ୱ କେଉଁ ନେତାଙ୍କୁ ଦିଆଯାଇଛି, ସେ ସବୁ ଗୋଟି ଗୋଟି କରି ଖୋଲି କହିଛନ୍ତି ସୁଶାନ୍ତ। ବିଜେଡିର ଏହି ଭିତିରି କଥା, ଏବେ ସୋଶାଲ୍‌ ମିଡିଆରେ ଘୁରି ବୁଲୁଛି।

ବିଧାୟକ ସୁଶାନ୍ତ ବେହେରା ଖୋଲାଖୋଲି ଭାବେ କହିଛନ୍ତି, ଟିକେଟ୍ ତାଲିକାରେ ନାଁ ଚଢ଼ିବାକୁ ହେଲେ ପ୍ରଥମେ ଦରକାର ଜିଲ୍ଲାପାଳଙ୍କ ଗ୍ରୀନ୍ ସିଗ୍ନାଲ୍। ବିଡ଼ିଓ ଓ ଅନ୍ୟ ଜିଲ୍ଲା ଅଧିକାରୀଙ୍କ ମତାମତ ଭିତ୍ତିରେ ଜିଲ୍ଲାପାଳ ରିପୋର୍ଟ ପ୍ରସ୍ତୁତ କରନ୍ତି। ତେବେ କେବଳ ଜିଲ୍ଲାପାଳଙ୍କ ରିପୋର୍ଟ ନୁହେଁ, ବିଭିନ୍ନ ଏନ୍‌ଜିଓ ଜରିଆରେ ଏଥିପାଇଁ ସର୍ଭେ ହୋଇଥିବା କହିଛନ୍ତି ସୁଶାନ୍ତ। ତା’ଛଡ଼ା ଚୟନରେ ଶିଳ୍ପପତିମାନଙ୍କର ମଧ୍ୟ ସୁପାରିସ୍‌ ରହୁଥିବା ସୁଶାନ୍ତ କହିଛନ୍ତି।

କୋଟେରୀ ଗ୍ରୁପ୍‌ରେ କେଉଁ ନେତା, କେଉଁ ଜିଲ୍ଲା ସଂପର୍କରେ ବୁଝିବେ ସେ ନେଇ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି.କେ. ପାଣ୍ଡିୟାନ ଦାୟିତ୍ୱ ବାଣ୍ଟି ଦେଇଥିବା ସୁଶାନ୍ତ କହିଛନ୍ତି। ଏହି ନେତାଙ୍କ ତାଲିକାରେ ପ୍ରତାପ ଜେନା, ଦେବାଶିଷ ସାମନ୍ତରାୟ, ବବି ଦାସ ଓ ସଂଜୟ ଦାସବର୍ମା ରହିଥିବା ସେ କହିଛନ୍ତି। ଏହାବାଦ୍ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱରେ ଥିବା ନେତାଙ୍କ ରିପୋର୍ଟ ଓ ରାଜ୍ୟ ଗୁଇନ୍ଦା ଶାଖାର ତଥ୍ୟକୁ ମଧ୍ୟ ଗୁରୁତ୍ୱ ଦିଆଯାଉଥିବା ସୁଶାନ୍ତ କହିଛନ୍ତି।

ତେବେ ସର୍ଭେ ରିପୋର୍ଟ ବାଦ ପ୍ରାର୍ଥୀ ସ୍ଥିର କରିବା ବେଳକୁ ପ୍ରଥମ ମାପକାଠି ଭାବେ ଆର୍ଥିକ ସ୍ଥିତି କାହାର ସବୁଠୁ ଭଲ, ତାକୁ ଗୁରୁତ୍ୱ ମିଳୁଥିବା କହିଛନ୍ତି ବିଧାୟକ ସୁଶାନ୍ତ। ସେହିପରି ନିର୍ବାଚନ ବେଳେ ପ୍ରାର୍ଥୀମାନଙ୍କୁ ଦଳ ପକ୍ଷରୁ ମିଳୁଥିବା ଆର୍ଥିକ ପାଣ୍ଠିର ଗୁମର ଖୋଲିଛନ୍ତି। ଗତ ନିର୍ବାଚନ ବେଳେ ସେ ନିଜେ ପାର୍ଟିଠାରୁ ତିନୋଟି ପର୍ଯ୍ୟାୟରେ ୬୦ ଲକ୍ଷ ନେଇଥିବା ବେଳେ ଗତଥର ପ୍ରାର୍ଥିପତ୍ର ଦାଖଲ ଦିନ ତାଙ୍କର ୨୨ ଲକ୍ଷ ଖର୍ଚ୍ଚ ହୋଇଥିବା ସେ ସ୍ୱୀକାର କରିଛନ୍ତି।

ଏହି ଭାଇରାଲ୍‌ ଭିଡିଓ ସଂପର୍କରେ ସୁଶାନ୍ତ ବେହେରାଙ୍କର ପ୍ରତିକ୍ରିୟା ମିଳିପାରିନାହିଁ। ତେବେ ଆଜି ବିଜେଡି ଘୋଷଣା କରିଥିବା ନୂଆ ପ୍ରାର୍ଥୀ ତାଲିକାରେ ଛେଣ୍ଡିପଦାରୁ ସୁଶାନ୍ତ ଟିକେଟ ପାଇଥିବା ନବୀନ ଘୋଷଣା କରିଛନ୍ତି। ଅନ୍ୟପକ୍ଷରେ ବିରୋଧୀ କଂଗ୍ରେସ ଓ ବିଜେପି ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି।

ପିସିସି ମିଡିଆ ସେଲ୍‌ ମୁଖ୍ୟ ସତ୍ୟ ପ୍ରକାଶ ନାୟକ କହିଛନ୍ତି-“ଜିଲ୍ଲାପାଳ ଓ ଗୁଇନ୍ଦା ରିପୋର୍ଟ ଆଧାରରେ ବିଜେଡିରେ ଟିକେଟ ଦିଆଯାଉଛି। ଏହାର ପ୍ରମାଣ ହେଉଛି ଭାଇରାଲ୍‌ ହୋଇଥିବା ଭିଡିଓ।”

ବିଜେପି ମୁଖପାତ୍ର ଗୋଲକ ମହାପାତ୍ର କହିଛନ୍ତି-“ବିଜେଡି ଟିକଟ ଚୟନରେ ରାଜ୍ୟ ଗୁଇନ୍ଦା ବିଭାଗ କାମ କରୁଥିବା ଏକ ରିପୋର୍ଟ ସାମ୍ନାକୁ ଆସିଥିଲା। ଯାହାକୁ ରାଜ୍ୟ ସରକାର ଫାଙ୍କି ଦେଇଥିଲେ। ଏବେ ଭିଡ଼ିଓ ଭାଇରାଲ୍‌ ହେବା ପରେ ଟିକଟ ଚୟନରେ ଗୁଇନ୍ଦା କାମ କରୁଥିବା ପ୍ରମାଣ ମିଳିଛି।”

ବିଜେଡି ମୁଖପାତ୍ର ସସ୍ମିତ ପାତ୍ର କହିଛନ୍ତି-“ଯାହାର ଭିଡ଼ିଓ ଭାଇରାଲ୍‌ ହୋଇଛି, ସେହି ବିଧାୟକ ମୁହଁ ଖୋଲୁନାହାନ୍ତି। ଏପରି ସ୍ଥିତିରେ ବିଜେଡି କଣ କହିବ।”

x

COVID-19

India
Confirmed: 2,461,190Deaths: 48,040
error: Content is protected !!