India

ରାଜ୍ୟ ସଭା ଅଧ୍ୟକ୍ଷଙ୍କୁ ୧୭ ବିରୋଧୀ ଦଳର ଚିଠି : ବିନା ଯାଞ୍ଚରେ ଗୃହୀତ ହେଉଛି ବିଲ୍‌

ନୂଆଦିଲ୍ଲୀ,୨୭ା୭: ପାର୍ଲାମେଣ୍ଟରେ ସରକାର ତରବରିଆ ଭାବେ ବିଲ୍‌ ଗୃହୀତ କରାଇ ନେଉଥିବାରୁ ଏହା ଉପରେ ଚିନ୍ତା ପ୍ରକଟ କରି ୧୭ଟି ବିରୋଧୀ ଦଳ ରାଜ୍ୟ ସଭା ଅଧ୍ୟକ୍ଷ ଏମ୍‌. ଭେଙ୍କାୟା ନାଇଡୁଙ୍କୁ ପତ୍ର ଲେଖିଛନ୍ତି। ଗୃହର ପ୍ରତିଷ୍ଠିତ ପରମ୍ପରାରୁ ଦୂରେଇଯାଇ ବିନା ଯାଞ୍ଚରେ ବିଲ୍‌ ଗୃହୀତ କରାଯାଉଛି। ଆଇନ ପ୍ରଣୟନର ଏହା ସୁସ୍ଥ ପରମ୍ପରା ନୁହେଁ ବୋଲି ସେମାନେ ଦର୍ଶାଇଛନ୍ତି।


କଂଗ୍ରେସ ସମେତ ସମାଜବାଦୀ ପାର୍ଟି, ତୃଣମୂଳ କଂଗ୍ରେସ, ବହୁଜନ ସମାଜ ପାର୍ଟି, ରାଷ୍ଟ୍ରୀୟ ଜନତା ଦଳ, ତେଲୁଗୁଦେଶମ୍‌ ପାର୍ଟି, ସିପିଆଇ, ସିପିଆଇ(ଏମ୍‌) ପ୍ରମୁଖ ଦଳ ପକ୍ଷରୁ ଏହି ଚିଠି ଲେଖାଯାଇଛି। ଗୃହର ଷ୍ଟାଣ୍ଡିଂ କମିଟି ଏବଂ ସିଲେକ୍ଟ କମିଟିରେ ବିଲ୍‌ଗୁଡ଼ିକର ଯାଞ୍ଚ ହେଉ ନ ଥିବାରୁ ସେମାନେ ଉଦ୍‌ବେଗ ପ୍ରକାଶ କରିଛନ୍ତି। ଚତୁର୍ଦ୍ଦଶ ଲୋକ ସଭାରେ ୬୦ ପ୍ରତିଶତ ବିଲ୍‌ ସଂସଦୀୟ କମିଟିଗୁଡ଼ିକୁ ଯାଞ୍ଚ ପାଇଁ ପଠାଯାଇଥିଲା। ପଞ୍ଚଦଶ ଲୋକ ସଭାରେ ୭୧ ପ୍ରତିଶତ ବିଲ୍‌ ଯାଇଥିବାବେଳେ ଷୋଡଶ ଲୋକ ସଭାରେ ମାତ୍ର ୨୬ ପ୍ରତିଶତ ବିଲ୍‌ ଯାଞ୍ଚ ପାଇଁ ଯାଇଥିଲା। ବର୍ତ୍ତମାନ ସପ୍ତଦଶ ଲୋକ ସଭାର ପ୍ରଥମ ଅଧିବେଶନରେ ୧୪ ବିଲ୍‌ ଗୃହୀତ ହୋଇସାରିଲାଣି। ସେଥିରୁ ଗୋଟିଏ ହେଲେ ବିଲ୍‌ ଯାଞ୍ଚ ପାଇଁ ସଂସଦୀୟ କମିଟିକୁ ପଠାଯାଇନାହିଁ। ରାଜ୍ୟ ସଭା ଅଧ୍ୟକ୍ଷ ଏଥିରେ ହସ୍ତକ୍ଷେପ କରିବାକୁ ବିରୋଧୀ ଦଳଗୁଡ଼ିକ ଦାବି କରିଛନ୍ତି।

Related Articles

error: Content is protected !!
Close